അവതാരം (കവിത) എസ്.സരോജം

കല്ലുളികൊണ്ടു ചരിത്രമെഴുതിയ ശിലായുഗത്തിൽ നിന്നും

ശൂന്യാകാശവും കടന്നേറിയ മനുഷ്യബുദ്ധി

പ്രാണന്‍ പിടിച്ചുനിര്‍ത്തുവാനാവാതെ

പകച്ചുനില്ക്കുന്നു, കാലമേ സാക്ഷി!

കൊറോണ നീ വെറുമൊരു വൈറസല്ല

പ്രജ്ഞയറ്റ മര്‍ത്യനു
ബോധംതെളിക്കുവാനെത്തിയ

 മഹാവതാരം.

പണവും പദവിയും അധികാരഗർവങ്ങളും 

കണിക, രാസ, ജൈവായുധങ്ങളും

കേവലം, നിഷ്പ്രഭം നിന്‍റെ മുന്നിൽ.

എത്രയോ മഹാമാരികൾ 

മുന്പുമീ ഭൂമിയിൽ

തകര്‍ത്തെറിഞ്ഞജയ്യരായ് വാണ 

മർത്യകുലങ്ങളെ.

പിന്നെയും  തളിരിട്ടു പാരാകെപടർന്ന മാനവര്‍

പണിതുയർത്തിയതാണീയാഗോളസംസ്കൃതി.

ഇന്നു നീയവതാരമെടുത്തതെന്തിനോ, 

ദുരമൂത്ത മാനവര്‍ മലീമസമാക്കിയ 

ഭൂമിയാകാശങ്ങളെ വിമലീകരിച്ച്, 

ജാതിമതചിന്തതൻ വേരറുത്ത്,

വര്‍ണ്ണവെറിതീര്‍ത്ത്, പുത്തനാമൊരു

ലോകധര്‍മ്മം സ്ഥാപിക്കുവാനോ?