ഓര്‍മ്മയില്‍ ഒരു പൊന്നോണം (കവിത)

കേരളമക്കളിന്നെമ്പാടും  കൊണ്ടാടും 

ഇന്‍സ്റ്റന്റോണത്തിന്‍ വര്‍ണ്ണജാലം

കണ്ടുമടുത്തെന്‍റെ  കണ്ണുകള്‍ തേടുന്നു

ഗ്രാമീണ ബാല്യത്തിന്നോണക്കാലം.

തൂമലര്‍ത്തുമ്പകള്‍ പൂത്തോരെന്‍ വാടിയില്‍

പൊന്നോണത്തുമ്പികള്‍ പാറിവന്നു.

മോഹം മയങ്ങുമെന്‍ മാനസവേദിയി-

ലോര്‍മ്മകളാലോലം നൃത്തമാടി .

പുഴയില്‍ക്കുളിച്ചു മെയ്ച്ചന്തം വരുത്തിപ്പൊന്‍-

ചേലുള്ള പട്ടുപാവാടചാര്‍ത്തി.
പൂമുടി വാര്‍ന്നിട്ടു പിച്ചകപ്പൂ ചൂടി
വാര്‍നെറ്റിയില്‍ ചന്ദനക്കുറിയണിഞ്ഞു. 

ഓണപ്പൂക്കളം മോടിയില്‍ തീര്‍ക്കുവാന്‍

വാടാത്ത പൂവുമായോടിയെത്തും

ഓമനത്തോഴന്‍റെ  പൂങ്കവിളത്തൊരു

പൂമുത്തമേകിയാര്‍ത്തുല്ലസിച്ചും

ഓലപ്പന്തുമായ് കളിയാടാനെത്തുന്ന-

കോലപ്പനുപ്പേരി പങ്കുവച്ചും

മഞ്ഞക്കോടിചുറ്റി ചങ്ങാതിമാരുമാ -

യീണത്തില്‍ കൈകൊട്ടിപ്പാട്ടുപാടി ,

മൈലപ്പൂമാവിന്‍ കൊമ്പത്തു ഞാത്തിയോ -

രൂഞ്ഞാലിലാടിത്തിമര്‍ത്തു ചെമ്മെ.

ഓണത്തല്ലോണത്തെയ്യം പുലിക്കളി

മാവേലി കുമ്മാട്ടി വാമനനും

കോലം പലവിധം കെട്ടിയാടീടുവാ-

നാരോമല്‍ കൂട്ടുകാരൊത്തുകൂടി.

സാരള്യ രാഗമുണര്‍ത്തുമപ്പൊന്നോണ-

മിന്നെന്‍റെയോര്‍മ്മയില്‍ മാത്രമായി .

എങ്കിലും ചിങ്ങത്തിരുവോണനാളിനായ്‌

കാത്തിരിക്കുന്നു ഞാനാണ്ടുതോറും .

കള്ളവും ചതിയുമില്ലാതെ നമ്മുടെ

നാട്ടില്‍ സമത്വം പുലരുവോളം

സ്വര്‍ഗീയ സുന്ദര സങ്കല്പതീരത്തു

സ്വപ്നം കൊണ്ടോണവിരുന്നൊരുക്കാം.

സ്വാഗതം മാവേലിത്തമ്പുരാനേ ,യെന്‍റെ 

സ്വാഗതം പണ്ടത്തെ കൂട്ടുകാരേ.

സ്വാഗതം മാവേലിത്തമ്പുരാനേ ,യെന്‍റെ 

സ്വാഗതം കേരളനാട്ടുകാരേ .....