ബ്ലൂടൂത്ത്(കവിത )

.എന്‍റെ സ്വപ്നത്തിന്‍ ചില്ലുകൂട്ടില്‍ നിന്‍   

നൊമ്പരച്ചിന്തുകള്‍ പൂട്ടിവയ്ക്കാം .

കണ്ണുനീരും പാഴ്ക്കിനാവും ചേര്‍ത്ത

കോണ്ക്രീറ്റുകൊണ്ടൊരു വീടുവയ്ക്കാം .

പൂഴിമണ്ണുള്ള മുറ്റവും വേണ്ട

കോഴി കിണ്ടുന്ന പറമ്പുവേണ്ട

കാലിക്കു പാര്‍ക്കാനെരുത്തില്‍ വേണ്ട

കോരിക്കുടിക്കാന്‍ കിണറുവേണ്ട .

രാജമല്ലിയും നന്ത്യാര്‍വട്ടവും

പൂത്തുലയുന്ന കാഴ്ചയും വേണ്ട

സന്ധ്യക്കു പൊട്ടിവിരിയും പിച്ചി –

മൊട്ടിന്‍ മണവും നമുക്കുവേണ്ട .

കനംതൂങ്ങും കതിര്‍ക്കുല വേണ്ട

കൊയ്തുനിറയ്ക്കാനറകള്‍ വേണ്ട

അരച്ചും പൊടിച്ചും വച്ചുവിളമ്പാ –

നടുക്കളയും നമുക്കു വേണ്ട.

ഇവയെല്ലാം പഴഞ്ചനായെന്നു

കണ്ണുമടച്ചു നമുക്കു ചൊല്ലാം .

ആഗോളമാളില്‍ ക്യൂനിന്നു വാങ്ങാം

ചേലുള്ള പായ്ക്കറ്റിലെന്തുമേതും .

കാന്‍സറും രക്താതിമര്‍ദ്ദവും പഞ്ച-

സാരയും കൊളസ്ട്രോളുമങ്ങനെ

എത്രയെത്ര പുത്തന്‍ പദങ്ങള്‍

ചേര്‍ത്തു ജീവിതനിഘണ്ടുവില്‍.

ബോഡീഷേപ്പിനോ ട്രെഡ്മില്ലുണ്ട് .

ഫാസ്റ്റ്ഫുഡ്ഡും മിനറല്‍വാട്ടറും

പ്ലാസ്റ്റിക്പൂക്കളും ഫോറിന്‍സുഗന്ധവും

പോരേ! നമ്മളും മോഡേണല്ലേ ?

മാര്‍ക്സിയന്‍ തത്വശാസ്ത്രങ്ങള്‍ വേണ്ട .

ഗാന്ധിയും ക്രിസ്തുവും നമുക്കു വേണ്ട .

വേളിയും വീടരും വേണ്ട, നല്ല

ജീനുകള്‍മാത്രം കരുതിവയ്ക്കാം .

പാത്തുപതുങ്ങി, പെണ്ണിന്‍റെ നഗ്നത

ഫോണിന്‍റെയക്കൊച്ചു സ്ക്രീനിലാക്കാം

ബ്ലൂടൂത്തുകള്‍ തുറന്നിടാം നല്ല

വീഡിയോ ക്ലിപ്പുകള്‍ കൈമാറിടാം.

വിരല്‍ത്തുമ്പു തൊട്ടാല്‍ കണ്മുമ്പിലെത്തും 

വെബ്ബിന്‍റെ ലോകമെത്ര വിചിത്രം!

ഇവയൊക്കെയീ ഐറ്റിയുഗത്തിന്‍റെ

നേട്ടങ്ങളെന്നു നമുക്കു ചൊല്ലാം .