ഒരു കുഞ്ഞുനൊമ്പരം (കവിത )

കണ്ണുനീരിന്‍റെ ഉപ്പുചേര്‍ത്ത്

കന്നിപ്പൂവിന്‍റെ നോവുചേര്‍ത്ത്

ചോറും കറിയും വിളമ്പിത്തരാന്‍

അമ്മയുണ്ടെന്‍റെ കൊച്ചുവീട്ടില്‍.

കിട്ടുന്നതെല്ലാം കള്ളുഷാപ്പില്‍

കാണിക്കവച്ചെന്‍റെയച്ഛനെത്തും.

പിന്നെപ്പുകിലാണു വീട്ടിലെന്‍റെ –

യമ്മയ്ക്കു നെഞ്ചത്തു ചെണ്ടകൊട്ട്.

എന്നും നേരം വെളുക്കുവോളം

ചേച്ചിയും ഞാനുമൊളിച്ചിരിക്കും.

കണ്ടുവെന്നാലച്ഛന്‍ വിളിക്കും:

പൊന്നുമോളിങ്ങടുത്തു വരൂ.

ചെന്നാലച്ഛന്‍റെ കള്ളമുത്തം,

എല്ലായിടത്തും കള്ളുനാറ്റം.

ചെന്നില്ലെങ്കിലോ കഷ്ടമെന്‍റെ –

യമ്മയ്ക്കു പിന്നെയും ചെണ്ടകൊട്ട് .

തേങ്ങിക്കരഞ്ഞു തളര്‍ന്നിരിക്കും

ചേച്ചിയും ഞാനുമടുക്കളയില്‍.

എന്നും പതിവാണിതെന്‍റെ വീട്ടില്‍;

ദൈവങ്ങളെല്ലാമുറക്കമത്രെ!