സൗഹൃദം(കവിത)

 
ആര്‍ദ്രത മുറ്റും സൌഹൃദവാക്കുകള്‍

അമൃതത്തുള്ളികളെന്നതുപോല്‍

അരികെപ്പെയ്യും നേരത്തകലും

അലസമകല്‍ച്ച വിചാരങ്ങള്‍.

ജീവിതസാഗരമതിലൊരു മുത്തായ്‌

ജന്മമെടുത്തൊരു സൌഹൃദമേ,

ജനിമൃതിതന്‍ കാലപ്പൊരുളുകളില്‍

ജീവിതമോഹമണപ്പതു നീ.

ഉള്ളില്‍ വീണൊരു ജലബിന്ദുവിനെത്ത–

ന്നുള്ളില്‍ നൊന്തുവളര്‍ത്തി മിനുക്കി

മുത്തായ്‌ മാറ്റും ചിപ്പി കണക്കെ സജ്ജന-

ഹൃത്തില്‍ വിളയും സൗഹൃദമുത്ത്.

സ്വാര്‍ത്ഥത താളപ്പിഴ ചേര്‍ത്തെന്നാലും

സൌഹൃദമുള്ളില്‍ വിങ്ങിപ്പുലരും;

സ്മൃതിതീരങ്ങളിലലയും ഹൃദയം     

സുഗമസമാഗമമിച്ഛ്‌ക്കും.

 ജീവനില്‍ പുതുമഴ പെയ്യിക്കും സ്നേഹ-

വിലാസംതാനീ സൌഹൃദരാഗം.

വേര്‍പിരിയും നേരത്തോളം മര്‍ത്യന്‍

സ്നേഹത്തിന്‍ വിലയറിയില്ല.

വില പറയാത്തൊരു നിധിയായതു

കരളില്‍ കരുതണമതിധന്യം.

ഇന്നിന്നോര്‍മ്മ  സുഗന്ധമതല്ലോ നല്ലോ-

രിന്നലെയുടെ സ്നേഹവസന്തം.