ഇക്കഴിഞ്ഞ മെയ്‌ ഇരുപത്തൊന്നു മുതല്‍ ഇരുപത്തേഴു വരെയുള്ള ~ഒരാഴ്‌ചക്കാലം കുട്ടികളും പേരക്കുട്ടികളുമൊത്ത്‌ പ്രകൃതിയുടെ സ്വച്ഛസൗന്ദര്യങ്ങളിലൂടെ ഹൃദയപൂര്‍വ്വം ആര്‍ത്തുല്ലസിച്ചുനടക്കുകയായിരുന്നു ഞങ്ങള്‍ കുറേ അപ്പുപ്പന്മാരും അമ്മുമ്മമാരും. ഒന്നരവയസ്സുകാരന്‍ അലന്‍ റോബിന്‍ മുതല്‍ എഴുപതുവയസ്സുകാരന്‍ രാധാകൃഷ്‌ണന്‍ വരെ ഉണ്ടായിരുന്നു ഇരുപത്തിയൊമ്പതുപേരടങ്ങിയ യാത്രാസംഘത്തില്‍. കന്യാകുമാരിമുതല്‍ കൈലാസംവരെ സാഹസ സഞ്ചാരം നടത്തി ധാരാളം അനുഭവസമ്പത്തുള്ള ജെ.പി.ചന്ദ്രകുമാര്‍ ആയിരുന്നു ടീം ക്യാപ്‌റ്റന്‍. ഞായറാഴ്‌ച രാവിലെ ആറുമണിക്ക്‌ സെക്രട്ടറിയേറ്റ്‌ പരിസരത്തുനിന്ന്‌ സണ്ണി ഡേ ട്രാവല്‍സിന്റെ ലക്ഷ്വറി കോച്ചില്‍ യാത്ര ആരംഭിക്കുകയായി. പ്രകൃതിയുടെ തനിമയും സൗന്ദര്യവും കണ്ണുകളില്‍ കോരിനിറച്ചുകൊണ്ട്‌ പശ്ചിമഘട്ട മലനിരകളിലൂടെ, അവിസ്‌മരണീയമായൊരു സഞ്ചാരം
`പുഴകള്‍, മലകള്‍, പൂവ നങ്ങള്‍...
ഭൂമിക്ക്‌ കിട്ടിയ സ്‌ത്രീധനങ്ങള്‍....'
തുമ്പൂര്‍മൂഴിയിലെ ബട്ടര്‍ഫ്ലൈ പാര്‍ക്ക്
കുട്ടികളുമൊത്ത്‌ ആതിരപ്പള്ളിക്ക്‌ പോകുമ്പോള്‍ തൃശൂര്‍ ജില്ലയിലെ തുമ്പൂര്‍മൂഴി ഡാമിലും ഒന്നിറങ്ങുക. ഇതിനടുത്ത്‌ കുട്ടികളെ കൊതിപ്പിക്കുന്ന ഒരു പാര്‍ക്കുണ്ട്‌; ചാലക്കുടിപ്പുഴയ്‌ക്കരികിലുള്ള ബട്ടര്‍ഫ്‌ളൈ ഗാര്‍ഡന്‍.
ചെറുതും വലുതുമായ നൂറ്റിനാല്‍പത്തിയെട്ട്‌ ജാതി ചിത്രശലഭങ്ങളും വിശേഷപ്പെട്ട പലജാതി ചെടികളും പൂക്കളും പ്രകൃതിയോടിണങ്ങിക്കഴിയുന്ന അപൂര്‍വസുന്ദരമായ ഒരിടമാണിത്‌.
കുട്ടികളുടെ മാനസികോല്ലാസത്തിനുതകുന്ന ധാരാളം വിനോദോപാധികളും പാര്‍ക്കില്‍ ഒരുക്കിയിട്ടുണ്ട്‌. പ്രവേശനകവാടം മുതല്‍ കളിക്കോപ്പുകളില്‍വരെ ചിത്രശലഭങ്ങളുടെ രൂപങ്ങള്‍ പതിച്ചുവച്ചിരിക്കുന്നു.
പൂന്തേന്‍ നുകര്‍ന്നും പാറിപ്പറന്നും ഉല്ലസിക്കുന്ന പൂമ്പാറ്റകള്‍ക്കിടയിലൂടെ ഉത്സാഹത്തോടെ പാറിനടന്നപ്പോള്‍ കൊച്ചുമക്കള്‍ക്കും ചിറകുമുളച്ചതുപോലെ
അപൂര്‍വയിനങ്ങളില്‍പെട്ട കുഞ്ഞന്‍ ശലഭങ്ങളെ നോക്കി അല്ലുക്കുട്ടന്‍ ചോദിച്ചു:
പപ്പാപ്പേ, എന്താ ഇതൊന്നും വലുതാവാത്തേ?
അത്‌ ചെറിയയിനം ശലഭങ്ങളായോണ്ടാ. ഇത്രയേ വളരൂ.
ഒത്തിരി പൂന്തേന്‍ കുടിച്ചാലോ?
എന്നാലും ഇത്രയേ വളരൂ.
പൂവിലെ തേനല്ലാതെ വേറൊന്നും കഴിക്കൂലേ?
ഇല്ല കുട്ടാ, ചിത്രശലഭങ്ങള്‍ക്ക്‌ കൊമ്പുകൊണ്ട്‌ പൂവിലെ തേന്‍ വലിച്ചുകുടിക്കാന്‍ മാത്രമേ കഴിയൂ.
അയ്യോ, പാവം. നമ്മക്കാണെങ്കി എന്തെല്ലാം കഴിക്കാന്‍പറ്റും, അല്ലേ പപ്പാപ്പേ?
നമുക്കുചുറ്റും എന്തുമാത്രം ജീവികളുണ്ട്‌, ഓരോന്നിന്റെയും ആഹാരരീതി വേറെവേറെയല്ലേ?
ഞാന്‍ വലുതാമ്പം അതെല്ലാം പഠിച്ചിട്ട്‌ പപ്പാപ്പയ്‌ക്ക്‌ പറഞ്ഞു തരാമേ.
ചിരിച്ചുകൊണ്ട്‌ ഞാനവനെ കെട്ടിപ്പിടിച്ച്‌ കവിളത്തൊരുമ്മ കൊടുത്തു.
